Մաալուլայի ազատ արձակուած մայրապետներուն նուիրուած Ս. Պատարագ` Դամասկոսի մէջ

Մաալուլայի Մար Թաքլա վանքի մայրապետներուն ազատ արձակումին առիթով եւ մայրապետներուն մասնակցութեամբ երէկ Դամասկոսի Ս. Խաչ եկեղեցւոյ մէջ տեղի ունեցաւ Ս. պատարագ, որուն ընթացքին Անտիոքի եւ համայն Արեւելքի յոյն ուղղափառ համայնքի Եուհաննա Ժ. Եազիժի պատրիարքի ընդհանուր փոխանորդ Աֆրամ Մաալուլի եպիսկոպոսը յայտնեց, որ յոյն ուղղափառ եկեղեցւոյ համար ասիկա նոր Զատիկ է, այլ ձեւի Զատիկ մը, որ Մեծ պահքի առաջին շաբաթէն սկսեալ միացած է իրենց:
«Անիկա ուրախութեան Զատիկ է եւ յարութեան Զատիկ` բոլորին եւ յատկապէս Սուրիոյ համար, նկատի ունենալով, որ Մար Թաքլայի մեր քոյրերը հասած են ազատութեան եւ ապահովութեան ափը», ըսաւ Մաալուլի եպիսկոպոսը:
Ան շնորհակալութիւն յայտնեց Սուրիոյ եւ անոր ղեկավարութեան, որ գծեց մայրապետները ազատ արձակելու ճամբան:
Մաալուլի եպիսկոպոսը հաստատեց, որ Սուրիա այսօր կը ներկայացնէ ահաբեկչութիւնն ու բռնութիւնը զգետնող երկրի մը պատկերը:
Ան շնորհակալութիւն յայտնեց նաեւ Լիբանանի եւ անոր ապահովական կառոյցներու դերակատարութեան, որուն շնորհիւ կարելի եղաւ երաշխաւորել մայրապետներուն ազատ արձակումը:
Իր խօսքը ուղղելով Եուհաննա Իպրահիմ եւ Պուլոս Եազիժի առեւանգուած եպիսկոպոսներուն` Մաալուլի եպիսկոպոսը նշեց, որ Հալէպի անոնց թեմերը անհամբեր են դարձեալ հանդիպելու անոնց հետ: